रण के लोकगीत: ‘मीठ पानी’ के एगो देस, कच्छ

पानी आउर बारिश के कमी वाला एह इलाका खातिर एगो लोकगीत, ‘मीठ पानी’. कच्छ विविध संस्कृति, कला आउर मूल्य के धरती हवे. एह धरती आउर इहंवा के वासी के गुणगान करे वाला एगो लोकगीत.

एक हजार बरिस पहिले लाखो फुलानी (920 ईस्वी में जन्मल) नाम के एगो राजा रहस. ऊ कच्छ, सिंध आउर सौराष्ट्र के इलाका पर राज करत रहस. आपन रियासत के लोग के बहुते प्यार आउर ख्याल रखे वाला फुलानी के महान शासक मानल जाला. आपन प्रजा खातिर ऊ आपन सर्वस्व न्योछावर कर देले रहस. लोग आजो उनकरा बहुत प्यार आउर इज्जत से इयाद करेला. उनकरा बारे में कहावत ह, “लाखो नाम के बहुत लोग होई, बाकिर आपन लोग के दिल पर राज करे वाला लाखो फुलानी एके गो बाड़न.”

‘मीठ पानी’ में उनकर बात हवे. एह लोकगीत में धार्मिक एकता आउर भाईचारा के गुणगान हवे. मेलजोल के संस्कृति कच्छ के पहचान हवे. गीत में एकरे महक बा. इहंवा धार्मिक आस्था के अलग अलग प्रतीक हवे. हिंदू खातिर मंदिर, त मुसलमान खातिर मस्जिद हवे.  जइसे हाजीपीर के दरगाह, जइसे देशदेवी में आशापुरा माता के मंदिर. एह गीत में पुरातन धरोहर के धनी कच्छ के इतिहास के झलक भी बा. जइसे कि काराकोट गांव में फुलानी के बनावल किला.

लोकगीत के संग्रह के दोसर गीत जइसन ई गीत भी प्रेम के बारे में बा, बिछोह के बारे में बा, पीड़ा के बारे में बा, त एह में बियाह, मातृभूमि से लेकर महिला सशक्तिकरण, लोकतांत्रिक अधिकार आउर जिनगी के कई गो दोसर भाव भी बा.

पारी जल्दिए कच्छ के अइसन आउर 341 लोकगीत के आपन कच्छी लोकगीत मल्टीमीडिया संग्रह में जगह देवे वाला बा. एह सभे के ऑडियो फाइल बनावल जाई. एह में कच्छ के मूल भाषा में लोक कलाकारन के गावल गीत होई. लोकगीत गुजराती लिपि में पढ़े के मिला. एकरा इलावा, एह सभे के अनुवाद अंग्रेजी आउर पारी में छपे वाला 14 गो दोसर भाषा में भी पढ़े के मिली.

कच्छ के दक्षिण में समंदर बा, त ऊत्तर में रेगिस्तना. ई 45,612 वर्ग किमी के क्षेत्र में फइलल बा. एकर गिनती भारत के सबसे बड़ जिला में होखेला. इहंवा के जलवायु अर्द्ध शुष्क मानल जाला. कच्छ में रहे वाला लोग सूखा आउर रोज के पानी के कमी से जूझत रहेला.

कच्छ तरह-तरह के जाति, धर्म आउर समुदाय के एगो गुलदस्ता जइसन बा. इहंवा के जादे लोग 1000 बरिस पहिले दोसरा जगह से आके कच्छ में बसल पुरखा के वंशज हवे. हिंदू, मुस्लिम के अलावा इहंवा रबारी, गढ़वी, जाट, मेघवाल, मुतवा, सोधा राजपूत, कोली, सिंधी आउर दरबार जइसन समुदाय के लोग भी बसल बा. कच्छ के समृद्ध आउर अखंड विरासत के झलक इहंवा के लोग के अनूठा कपड़ा, कढ़ाई, संगीत आउर दोसर सांस्कृतिक परंपरा सभ में देखल जा सकेला. साल 1989 में कच्छ महिला विकास संगठन (केएमवीएस) के स्थापना कइल गइल रहे. ई संगठन इहंवा के लोग के संगठित, सशक्त करे आउर एकर कला आउर परंपरा के बनाए रखे में जुटल बा.

पारी केएमवीएस संगे मिलके कच्छ लोकगीत के एगो समृद्ध संग्रह लेके आइल बा. एह संग्रह के सभे गीत के रिकॉर्डिंग, केएमवीएस के एगो पहल के हिस्सा बा. कच्छ महिला विकास संगठन महिला सशक्तिकरण के आगे बढ़ावे खातिर जमीनी स्तर पर काम करेला. एकरा जरिए केतना मेहरारू लोग आज सामाजिक बदलाव के सिपाही बनल बा. संगठन एगो आपन मीडिया सेल भी बनइले बा. ऊ लोग कच्छ के समृद्ध गीत-संगीत के आगू बढ़ावे खातिर समुदाय के ओरी से नियमित रूप से एगो रेडियो प्रसारण शुरू कइलक ह. एह प्रसारण के नाम, सुरबानी (सुरवाणी) बा. बिना कवनो तरह के औपचारिकता के, 305 गो संगीतकार लोग, संगीत के 38 तरह के रूप लेके आइल बा. सुरबानी कोशिश करत बा कि कच्छ लोकसंगीत के कलाकार लोग के दशा में सुधार होखे. एहि खातिर इहंवा के लोक संगीत के परंपरा बनाए रखे, एकरा आगू बढ़ावे, मजबूत करे, आउर फेरु से नया जान फूंके के अभियान सुरु हो गइल बा...

केएमवीएस सचिव प्रीति सोनी, अरुण ढोलकिया, केएमवीएस समन्वयक अमद समेजा के उनकर समर्थन आउर भारतीबेन गौड़ के गुजराती अनुवाद खातिर बहुते बहुते धन्यबाद रही.

अनुवाद: स्वर्ण कांता