بنگو میں جسموں کو توڑنے والی کچ دھات

یورینیم کے لیے جڈوگوڈا کی پہاڑیوں میں پانچ دہائیوں سے کانکنی ہو رہی ہے – جس کی وجہ سے آس پاس کے گاؤوں میں نصف صدی سے زہریلے مادّے جمع ہو رہے ہیں۔

تورام ڈیہہ کی ایک اوپن کاسٹ کان (جڈوگوڈا سے تقریباً ۲۰ کلومیٹر دور)؛ لوگ مشکل سے ۵۰۰ میٹر کی دوری پر رہتے ہیں۔ بہار قانون ساز اسمبلی کی ماحولیاتی کمیٹی نے، ۱۹۹۸ کی ایک رپورٹ میں کہا تھا کہ کان کے کچرے کو پھینکنے والی جگہ سے پانچ کلومیٹر کے اندر کوئی گاؤں نہیں ہونا چاہیے۔

کلیکا پور گاؤں کا امت گوپ، عمر تقریباً ۷ سال، دماغی معذوری کے ساتھ پیدا ہوا تھا۔ وہ نہ تو چلتا ہے اور نہ ہی بات کرتا ہے، اور دن کے زیادہ تر وقت اپنی چارپائی پر لیٹا رہتا ہے۔

بچے بنگو میں کچی سڑک پر کھیل رہے ہیں – یہ جگہ زہریلے کچ دھات پروسیسنگ پلانٹس اور کوڑے دان سے بہت زیادہ دور نہیں ہے۔

کالی بودھی گوپ (۱۸) کو ہڈی کی بیماری ہے اور پیٹھ کے اوپری حصہ میں کوبڑ نکلا ہوا ہے۔ وہ دیر تک کھڑی نہیں ہو سکتیں، لیکن تقریباً ۳۵ کلومیٹر دور، جمشیدپور کے انٹرمیڈیٹ کالج میں ہفتہ میں دو دن جاتی ہیں۔

انامیکا اورام (۱۴) کو چہرے کا ٹیومر ہے جو مہلک بن سکتا ہے۔ ڈاکٹروں کا کہنا ہے کہ اس کا آپریشن ضروری ہے، لیکن ان کی فیملی سرجری کا خرچ برداشت نہیں کر سکتی۔

کلیکا پور میں جب میری ملاقات تارک داس (۳۵) سے ان کی پنساری کی دکان پر ہوئی، تو انھوں نے مجھ سے پوچھا کہ ان کی فیملی کو مدد کب ملے گی۔ ’’دادا، میرے دو بچے ہیں، ایک بیٹی، ایک بیٹا،‘‘ انھوں نے کہا۔ ’’میں ہر وقت فکرمند رہتا ہوں – جب میں کام کرنے لائق نہیں رہوں گا، تو ان کا کیا ہوگا؟ اگر میں تھوڑی دیر کے لیے بھی کھڑا ہوتا ہوں تو میری کمر میں کافی درد ہونے لگتا ہے، لیکن مجھے اپنے بچوں کے لیے کام تو کرنا ہی ہے۔‘‘

اس ٹیلنگ پانڈ (نالے) میں یورینیم پروسیسنگ پلانٹ سے نکلنے والے شعاع پذیر کچرے ہیں۔ یہ تورام ڈیہہ کان کے قریب واقع بستی سے ہوکر گزرتا ہے۔

ہردھن گوپ (۱۸) کو چہرے کا عیب ہے اور ان کا سر ان کے جسم کے تناسب سے چھوٹا ہے۔ پھر بھی، وہ کھیتوں میں کام کرتے ہیں، دھان کاٹنے میں اپنے والد کی مدد کر رہے ہیں۔

ایک چھوٹا لڑکا جڈوگوڈا کے قریب سوبرن ریکھا ندی سے گھونگھے جمع کر رہا ہے۔ اس کی آبی زندگی ٹیلنگ پانڈس کے زہریلے کچرے کی وجہ سے دھیرے دھیرے ختم ہو رہی ہے، جو ندی میں سیدھے گرتا ہے۔

تقریباً ۱۸ سال کی پربتی گوپ (بیچ میں)، بنگو کے ایک پرائیویٹ کوچنگ سنٹر میں؛ ان کے والد ایک کسان ہیں۔ ’’میں سرکاری نوکری کرنا چاہتی ہوں،‘‘ وہ کہتی ہیں۔ ’’لیکن میرے پاس پڑھنے کے لیے سبھی کتابیں نہیں ہیں۔ میرے والد مجھ سے کہتے ہیں کہ فیملی کو چلانا مشکل ہو رہا ہے، پھر وہ میرے علاج کا خرچ کیسے برداشت کر سکتے ہیں؟‘‘

تقریباً ۱۶ سال کے راکیش گوپ کو دماغی فالج ہے؛ ان کی بہن گڑیا سات سال کی عمر میں مر گئی تھی۔  وہ اپنی پہیے دار کرسی سے مشکل سے اسکول جاتے ہیں، جہاں ان کو مڈ ڈے میل اور ماہانہ ۶۰۰ روپے معذوری کا سرکاری پنشن ملتا ہے۔ ان کی ماں مجھ سے کہتی ہیں، ’’میں ہمیشہ مستقبل کے بارے میں سوچتی ہوں... ہم نہیں رہیں گے تو کیا ہوگا؟ وہ خود سے کچھ بھی نہیں کر سکتا۔‘‘

راکیش اور گڑیا کی ماں [نام نہیں معلوم]، جو دھان کے کھیتوں پر بطور مزدور کام کرتی ہیں، اپنی سات سالہ بیٹی کی تصویر پکڑے ہوئی ہیں، جسے ہڈی کا مرض تھا اور جو ایپی لیپٹک ایپی سوڈ کے بعد مر گئی۔ ان کے بیٹے کو بھی دماغی فالج ہے۔ وہ کہتی ہیں، ’’راکیش کے پیدا ہونے کے بعد، جب ہمیں پتہ چلا کہ وہ کبھی چل نہیں پائے گا یا خود سے کوئی کام نہیں کر پائے گا، تو ہمیں کافی دکھ ہوا۔ جب گڑیا پیدا ہوئی، تو ہمیں خوشی ہوئی، لیکن جلد ہی ہمیں پتہ چلا کہ وہ بھی کبھی نہیں چل پائے گی...‘‘

راکیش اپنے پیر بالکل بھی نہیں ہلا سکتا۔ اس کی ماں روزانہ اسے نہلاتی ہیں اور پھر اسے واپس بنگو میں واقع اپنے گھر میں لے آتی ہیں۔