بھیم راؤ: ’ماں باپ کے گھر پیدا ہوا ایک ہیرا‘

ڈاکٹر بھیم راؤ امبیڈکر کی ۱۳۰ویں جینتی کے موقع پر، ہم پونہ کے نندگاؤں کی شاہو کامبلے کے گیتوں کا یہ مجموعہ لے کر آئے ہیں جو سماجی انصاف اور برابری سے متعلق امبیڈکر کی جدوجہد کی کہانی بیان کرتا ہے

اس نظم (او وی) میں، شاہو کامبلے اُس لمحہ میں ہونے والی خوشی کو بیان کرتی ہیں جب ڈاکٹر بی آر امبیڈکر اور رما بائی کسی کے گھر جاتے ہیں۔ ڈاکٹر امبیڈکر کی ۱۳۰ویں جینتی کے موقع پر، ’چکّی کے گانوں کے پروجیکٹ‘ کی اس قسط میں ان کے گیت، بابا صاحب کے تئیں محبت و احترام کا اظہار کرتے ہیں، جنہوں نے ذات پر مبنی ہندو معاشرے میں صدیوں سے ستائے گئے لوگوں کے بنیادی حقوق کے لیے جدوجہد کی۔

شاہو بائی، پونہ ضلع کے نندگاؤں میں رہتی تھیں۔ ۱۹۹۰ کی دہائی کے درمیانی سالوں میں، انہوں نے ’چکّی کے گانوں کے پروجیکٹ‘ (گرائنڈ مل سانگس پروجیکٹ) کی کور ٹیم کے لیے تقریباً ۴۰۰ گیت ریکارڈ کیے تھے۔ لیکن، جب ستمبر ۲۰۱۷ میں پاری جی ایس پی کی ٹیم ملشی تعلقہ میں ان سے ملنے پہنچی، تو ہمیں یہ افسوسناک خبر ملی کہ شاہو بائی کی ایک سال پہلے بچہ دانی کے کینسر کی وجہ سے موت ہو گئی تھی۔

وہ ایک کسان تھیں، اور انہوں نے دایہ کے طور پر بھی کام کیا تھا۔ ان کی دو بیٹیاں اور دو بیٹے ہیں۔ شاہو بائی روایتی طور پر پڑھی لکھی تو نہیں تھیں، لیکن عقیدہ کے لحاظ سے دلت بودھ تھیں اور ڈاکٹر امبیڈکر کے دکھائے راستے پر بطور نیو بدھسٹ چل رہی تھیں۔ نندگاؤں کی رہنے والی ان کی دوست اور نند کُسُم سوناونے کہتی ہیں، ’’گانوں کو بہترین دھنوں میں پرونے کی بہترین صلاحیت تھی شاہو بائی کے پاس۔‘‘ کسم نے بھی ’چکی کے گانوں کے پروجیکٹ‘ کے لیے گیت گائے ہیں۔

جن ڈاکٹر بھیم راؤ رام جی امبیڈکر کو ان کے ماننے والے ’بابا صاحب‘ کہتے ہیں، انہیں اپنے اسکول میں ذات پر مبنی تفریق کا سامنا کرنا پڑا تھا۔ انہیں دوسرے طلباء سے دور، کلاس روم کے دروازے کے باہر فرش پر بیٹھنے کے لیے کہا جاتا تھا اور پانی پینے کے برتن کو چھونے کی بھی اجازت نہیں دی جاتی تھی؛ صرف بڑی ذات کے طالب علم ہی ان برتنوں سے پانی پی سکتے تھے۔

۱۴ اپریل، ۱۸۹۱ کو اندور کے قریب موجود شہر مہو میں پیدا ہوئے ڈاکٹر امبیڈکر اپنے ماں باپ، رام جی اور بھیما بائی سکپال کی ۱۴ویں اولاد تھے۔ والد رام جی انگریزوں کی ہندوستانی فوج میں کام کرتے تھے۔ یہ فیملی بنیادی طور پر مہاراشٹر کے کونکن علاقے کے رتنا گیری ضلع کے امبڈوے گاؤں کی تھی، جہاں بھیم کو پڑھنے کے لیے اسکول بھیجا گیا تھا۔ وہاں کے ٹیچر کرشنا جی امبیڈکر اس لڑکے کے تیز دماغ سے اتنے متاثر ہوئے کہ انہوں نے اپنے شاگرد کو خود کا لقب دے دیا، یعنی امبیڈکر۔

بھیم راؤ نے ممبئی کے ایلفنسٹن ہائی اسکول سے میٹرک کی پڑھائی کی اور پھر بامبے یونیورسٹی کے ایلفنسٹن کالج سے بی اے کی ڈگری حاصل کی تھی۔ سال ۱۹۱۳ میں، وہ امریکہ چلے گئے، جہاں انہوں نے نیویارک کی کولمبیا یونیورسٹی سے اقتصادیات میں ایم اے کیا۔ وہ اپنا مقالہ جمع کرنے کے لیے بعد میں دوبارہ یونیورسٹی لوٹے اور سال ۱۹۲۷ میں پی ایچ ڈی کی ڈگری حاصل کی۔ درمیان کے سالوں میں، انہوں نے انگلینڈ کا سفر کیا۔ یہاں انہوں نے ایک ساتھ، لندن اسکول آف اکنامکس اینڈ پولیٹیکل سائنس میں ڈاکٹریٹ حاصل کرنے کے لیے تھیسس پر کام کیا اور ’گریس اِن‘ سے قانون کی پڑھائی کی۔

ان کی تعلیم اور تجربات نے انہیں ایک سیاسی لیڈر بننے میں مدد تو کی ہی، وہیں دوسری طرف ہندوستانی آئین کے بنیادی معمار کا رول نبھانے کے لیے بھی تیار کیا۔ ڈاکٹر امبیڈکر نے ذات کے نام پر ستائے گئے لوگوں کے حقوق کے لیے جدوجہد کرتے ہوئے کئی محاذ پر قیادت کی۔ ان کی قیادت والے سب سے مشہور احتجاجی مظاہروں میں سے ایک میں انہوں نے ۲۰ مارچ، ۱۹۲۷ کو مہاراشٹر کے مہاڑ ضلع میں عوامی تالاب چودار سے پانی پی کر مبینہ اچھوتوں کے لیے لگی پابندی کو توڑ دیا تھا۔

شاہو بائی کے گائے ۱۳ اشعار (او وی) میں سے پہلے آٹھ اشعار میں وہ ڈاکٹر امبیڈکر کی عوامی شخصیت اور زندگی کی مدح سرائی کرتی ہیں۔ گلوکارہ، بھیم راؤ کی اس سماجی حیثیت کی تعریف کرتی ہیں اور وہ منظر گاتی ہیں جس میں بابا صاحب ایک کار میں آتے ہیں اور اس میں گریل والا بونٹ ہوتا ہے۔ وہ اپنی حیرانی کا اظہار کرتے ہوئے کہتی ہیں کہ امبیڈکر اپنے ماں باپ کے گھر پیدا ہوئے ’ہیرا‘ تھے۔ شاہو بابا صاحب کو راجا کی شبیہ والا بتاتی ہیں، جب وہ ۹ کروڑ دلتوں کی قیادت کرتے ہوئے نظر آتے ہیں۔ اس کے لیے، وہ ان کے چھاتے پر لگے گُچھے کے نشان کا استعمال کرتی ہیں۔

حالانکہ، بابا صاحب اب اس دنیا میں نہیں ہیں، لیکن گلوکارہ کہتی ہیں، ’’’یہ مت کہو کہ بھیم مر چکے ہیں‘، کیوں کہ انہوں نے ہمیں نیلے جھنڈے کا نشان دیا ہے۔‘‘ اس جھنڈے کو، جس کے بیچ میں اشوک چکر بنا ہوا ہے، ڈاکٹر امبیڈکر نے آل انڈیا شیڈول کاسٹ فیڈریشن کے لیے منتخب کیا تھا۔ یہ ایک سیاسی پارٹی تھی، جسے انہیں سال ۱۹۴۲ میں قائم کیا تھا۔ دلتوں کے لیے یہ جھنڈا سیاسی اور سماجی طاقت اور اتحاد کی علامت ہے۔

گلوکارہ آگے گاتی ہیں کہ جس وقت گاندھی جیل میں ہیں، بھیم راؤ سوٹ، موزے اور جوتے پہن کر، اپنے ہاتھ میں ڈھیر ساری کتابیں لیے آتے ہیں اور عدالت میں ۹ کروڑ دلتوں کے لیے لڑتے ہیں۔

یہ گیت شاید پونہ پیکٹ کے آس پاس کے واقعات سے متاثر ہے، جو سال ۱۹۳۲ میں ڈاکٹر امبیڈکر اور گاندھی کے درمیان ہوا تھا۔ یہ انگریزوں کے اس اعلان کے بعد ہوا تھا، جب انہوں نے ’ڈپریسڈ کلاس‘ (درج فہرست ذات) کے لیے مرکز اور صوبائی اسمبلیوں میں جداگانہ انتخاب کا اعلان کیا تھا۔ گاندھی اس وقت پونہ کی یروڈا جیل میں تھے اور جداگانہ انتخاب کے خیال کے مخالف تھے۔ انہیں ڈر تھا کہ اس سے ہندو سماج تقسیم ہو جائے گا۔ وہ اس کی مخالفت میں بھوک ہڑتال پر بیٹھ گئے۔ لیکن امبیڈکر نے استحصال زدہ لوگوں کے حقوق کی لڑائی نہیں چھوڑی۔ دونوں لیڈر آخرکار مشترکہ انتخاب کے لیے مان گئے، لیکن صوبائی اسمبلیوں میں دلتوں کے لیے انتخابی سیٹیں محفوظ ہو گئیں۔

ساتویں شعر (او وی) میں شاہو گاتی ہیں کہ بھیم راؤ جب بھی آتے ہیں، انہیں رہنے کے لیے کمرہ مل جاتا ہے۔ وہ ایک برہمن لڑکی (دوسری بیوی، ڈاکٹر سویتا امبیڈکر کا حوالہ، جو پیدائشی برہمن تھیں) کے قریب آ گئے ہیں۔ وہ آگے کہتی ہیں، وہ شیشوں والی کار میں آتے ہیں جس سے بڑی ذات کی لڑکیاں متاثر ہوتی ہیں۔ ایسی معلومات فخر اور دلکشی پیدا کرتی ہیں، کیوں کہ مہار ذات، جس میں ڈاکٹر امبیڈکر کی پیدائش ہوئی تھی، کے لوگوں کو ذات پر مبنی سماج میں کوئی انسان ہی نہیں سمجھتا تھا۔ لیکن سماج کے ایک طبقہ نے بابا صاحب کی حصولیابیوں کے لیے ان کی ہمیشہ تعریف کی، جو مہار ذات کے لوگوں کے لیے فخر کی بات ہے۔

ڈاکٹر امبیڈکر نے جس طرح کی عوامی مقبولیت حاصل کی، اس کا مطلب تھا کہ دلتوں کے اس لیڈر نے ذات کی ایسی رکاوٹوں کو پار کر لیا جسے پار کرنے کے لیے صدیوں سے دلت جدوجہد کر رہے تھے۔ یہ لڑائی آج، ۲۱ویں صدی میں بھی جاری ہے۔

نویں گیت میں اس منظر کا ذکر ہے، جب گلوکارہ بابا صاحب اور رما بائی (ڈاکٹر امبیڈکر کی پہلی بیوی) کا مہمان کے طور پر استقبال کرنے کے لیے اپنے گھر کی صفائی اور آرائش کر رہی ہیں۔ آخری چار اشعار میں گلوکارہ، گوتم بدھ کے تئیں اپنا عقیدہ ظاہر کرتی ہیں، جن کی فراہم کردہ تعلیمات کو ڈاکٹر امبیڈکر نے اپنایا تھا۔ گلوکارہ جب صبح کو گھر کا دروازہ کھولتی ہیں، تو وہ بدھ کو دروازے کی دہلیز پر پاتی ہیں۔ وہ اپنے بیٹے سے کہتی ہیں کہ سونے اور چاندی سے بنی مورتیوں کی پوجا کرنے کی بجائے، بدھ کی تعلیمات پر عمل کرنا بہتر ہے۔ وہ کہتی ہیں، ’’دہاڑی پر نکلنے سے پہلے، صبح بدھ کو یاد کرو۔‘‘