وَانَوِل: لاک ڈاؤن کی بحران زدہ زندگی میں قوس قزح

’’ایک عام دن میں، میں ۴۰-۵۰ کلومیٹر سائیکل چلاکر پلاسٹک کے سامان بیچتا ہوں، جیسے کہ بالٹیاں اور برتن،‘‘ اے شیو کمار بتاتے ہیں۔ ناگ پٹّینم ضلع کی ایک آدیواسی بستی، اراسُر میں ۳۳ سالہ اس نوجوان کے لیے ایسے دن کی شروعات صبح ۵ بجے ہوتی ہے۔ ان کی اس سائیکل کے چاروں طرف رنگین پلاسٹک کے سامان بندھے ہوتے ہیں، جنہیں وہ اپنا گھر چلانے کے لیے بیچتے ہیں۔ وہ بتاتے ہیں کہ ایک عام دن میں وہ ۳۰۰-۴۰۰ روپے کما لیتے ہیں – جو کہ ان کی چھ رکنی فیملی کا پیٹ بھرنے کے لیے کافی ہوتا ہے۔

یہ عام دن نہیں ہیں۔

لاک ڈاؤن نے ان کی اس سرگرمی کو روک دیا ہے – اور اسی کے ساتھ، ان کی فیملی کا ذریعہ معاش بھی رک گیا ہے۔ لیکن شیو کمار کووِڈ- ۱۹ بحران کے سیاہ بادلوں میں امید کی ایک کرن دیکھ رہے ہیں۔ ’’اگر وانَوِل نہیں ہوتا، تو ہم بھوکے مر جاتے،‘‘ وہ کہتے ہیں۔

تمل زبان میں ’قوس قزح‘ کو وانَوِل کہتے ہیں۔ اس ضلع کے ناگ پٹّینم بلاک کے سِکّل گاؤں میں پرائمری اسکول کا بھی یہی نام ہے۔ ۲۱ اپریل تک ۴۴ لوگوں میں کورونا وائرس کے معاملے پازیٹو پائے جانے کی وجہ سے، ناگ پٹّینم تمل ناڈو کے کووڈ- ۱۹ ہاٹ اسپاٹ میں شامل ہے۔

یہ اسکول بنیادی طور سے خانہ بدوش قبیلوں کے طلبہ کی نگہداشت کرتا ہے اور یہ – یہاں پر کلاسیں نہیں ہو رہی ہیں تب بھی – ارسُر اور دیگر گاؤوں میں رہنے والوں کے لیے کھانے پینے کی چیزوں کا انتظام کر رہا ہے۔ لاک ڈاؤن کا اثر چونکہ گہرا ہوتا جا رہا ہے، لہٰذا یہ اسکول جن کنبوں کی مدد کر رہا ہے ان کی تعداد بڑھ کر اب ۱۲۲۸ ہو چکی ہے – جن میں سے تقریباً ۱۰۰۰ کا تعلق انتہائی پس ماندہ جماعتوں سے ہے۔ یہاں کے ہزاروں غریب لوگوں کے لیے، یہ اسکول اب غذائی تحفظ کا مرکز ہے۔

وانَوِل نے ان خانہ بدوش گروہوں کی مدد کے ساتھ شروعات کی جن کے لیے اس کا وجود ہے۔ لیکن، اسکول کی ڈائرکٹر – اور وانَوِل کی مینیجنگ ٹرسٹی – ۴۳ سالہ پریما ریوتی کہتی ہیں کہ دوسرے بھی پریشانی میں مبتلا تھے ’’اور پڑوس کے تریچی [تِروچیرا پلّی] ضلع کے گاؤوں کے لوگ بھی مدد کی اپیل کرنے لگے۔‘‘ اسکول کی تعلیمی سرگرمیاں ناگ پٹّینم اور تھیروَرور ضلعوں کا احاطہ کرتی ہیں۔

۲۴ مارچ کو جب لاک ڈاؤن کا اعلان ہوا، تو اسکول نے زیادہ تر بچوں کو ان کے گھر بھیج دیا – اُن ۲۰ کو چھوڑ کر جن کے لیے وانَوِل ہی ان کا گھر ہے – اس امید میں کہ وہ اپنے گھر والوں کے ساتھ بہتر محسوس کریں گے۔ اسٹاف کے پانچ لوگ کیمپس میں ہی رک گئے۔ لاک ڈاؤن کی میعاد جب آگے بڑھا دی گئی، تو اسکول انتظامیہ کے لوگوں کو احساس ہوا کہ جو بچے اپنے گھروں کو گئے ہوئے ہیں، وہ نہ تو وہاں صحت مند رہ پائیں گے اور نہ ہی اس بحران کے ختم ہونے کے بعد اسکول واپس لوٹیں گے۔ لہٰذا، اب انہوں نے صرف طلبہ اور ان کے گھر والوں پر ہی فوکس نہیں کیا، بلکہ اپنی سوچ کے دائرہ کو بڑھاتے ہوئے، انتہائی کمزور برادری پر بھی توجہ مرکوز کرنی شروع کر دی۔

تعلیم کے میدان میں وانَوِل کا فوکس ہمیشہ سے دو درج فہرست قبائل پر رہا ہے: آدِین اور نری کورَوَر۔ آدِین کو بڑے پیمانے پر بوم بوم ماٹّوکّرر کہا جاتا ہے (بی بی ایم؛ ’بوم بوم‘ اس آواز سے مشتق ہے جسے ماٹّوکّرر یا مویشی چرانے والے اپنے اُرومی ، ریت کی گھڑی جیسا دو سروں والا ڈھول، سے نکالتے ہیں)۔ اس نام کا استعمال زمانۂ قدیم میں ان کے ذریعے اختیار کیے گئے پیشگوئی کے پیشہ میں ہوتا تھا، جس میں وہ سہارا یا معاون کے طور پر پوری طرح سے سجائے گئے بیلوں کا استعمال کرتے تھے۔ اب بہت کم لوگ اسے آج بھی اپنائے ہوئے ہیں۔

اور ایسا لگتا ہے کہ ان کی تعداد مردم شماری ۲۰۱۱ میں مذکور تمل ناڈو کے ۹۵۰ گھروں سے کہیں زیادہ ہے۔ کمیونٹی کی تنظیموں کی گنتی کے حساب سے ریاست کے متعدد ضلعوں میں ان کی تعداد ۱۰ ہزار سے بھی زیادہ ہے۔ زیادہ تر لوگ خود کو آدین کہتے ہیں، لیکن ان میں سے اکثر کے پاس اس کیمونٹی کا سرٹیفکیٹ نہیں ہے۔ شیو کمار سمیت، ارسُر میں کم از کم ۱۰۰ بی بی ایم کنبے ہیں – اور یہ گروپ آج اگر زندہ ہے تو وانوِل کی مدد کی وجہ سے۔

نری کورَور – بنیادی طور سے شکاری – کافی پہلے سب سے پس ماندہ برادری کے طور پر درج فہرست کیے گئے تھے اور انہیں درج فہرست قبیلہ کا درجہ ۲۰۱۶ میں جاکر حاصل ہوا۔ وانَول کے طلبہ، حالانکہ، زیادہ تر بوم بوم ماٹّوکّرر ہیں۔

لاک ڈاؤن سے قبل، ۸۱ بچے – ۴۵ رہائشیوں سمیت – یہاں پڑھ رہے تھے۔ اور سرکاری اسکولوں میں جانے والے ۱۰۲ بچے اس کیمپس میں رہ رہے تھے۔ ٹرسٹ نے متعدد گاؤوں میں ’اسکول کے بعد کے مراکز‘ بھی قائم کر رکھے تھے، جن میں ۵۰۰ سے زیادہ دیگر بچوں کا احاطہ کیا جاتا تھا اور انہیں ہر شام کو غذائیت سے بھرپور ہلکا ناشتہ دیا جاتا تھا۔ لیکن اب ان مراکز میں بنیادی طور پر صرف ہاتھ دھونے والے سینیٹائزر ہی جمع کیے جا رہے ہیں – کیوں کہ اناج براہ راست پریشان حال کنبوں تک پہنچائے جا رہے ہیں، جن کی تعداد میں لگاتار اضافہ ہو رہا ہے۔

ریوتی بتاتی ہیں، ’’بہت سے گاؤوں میں، لوگ صرف ایک وقت کا کھانا کھا رہے ہیں۔ سب سے زیادہ اثر بچوں پر پڑا ہے، کیوں کہ انہیں مڈ ڈے میل نہیں مل رہا ہے۔ وانوِل میں، انہیں یہاں پر کھانا دینا ممکن نہیں تھا – زیادہ تر گھر جا چکے تھے۔‘‘ اور اس لیے انہوں نے ایمرجنسی پروگرام شروع کیا، جو شاید کسی ایک اسکول کے بس کی بات نہیں تھی۔ اس میں تیزی سے اضافہ ہوا اور اب زیادہ سے زیادہ غریب لوگوں کو اناج پہنچائے جا رہے ہیں۔

اس سے نمٹنے کے لیے، وانول نے رقم جمع کرنا شروع کیا ہے تاکہ ناگ پٹّینم اور تھیرورور کے نو گاؤوں اور تھنجاوور ضلع کے ایک گاؤں میں رہنے والے ۱۲۸۸ بنیادی طور سے خانہ بدوش کنبوں کی ضروریات پوری کی جا سکیں۔ اب، یہ تریچی ضلع کے چند کنبوں تک بھی پہنچ رہا ہے۔ وہ ناگ پٹّینم کے ۲۰ باہری افراد اور اس میونسپلٹی کے ۲۳۱ حفظانِ صحت کے کارکنان کو بھی کھانا مہیا کرنے کی کوشش کر رہا ہے۔

بیلوں کے ساتھ پیشگوئی کرنے والے کے طور پر بوم بوم ماٹّوکّرر کی ابتدائی تاریخ تھوڑی دھندلی ہے۔ تمل ناڈو آدِیَن ٹرائبل پیپلز ویلفیئر ایسوسی ایشن کے جنرل سکریٹری، کے راجو کہتے ہیں: ’’ایسا مانا جاتا ہے کہ ہمارے آباء و اجداد صدیوں پہلے زمینداروں کے یہاں بندھوا مزدوروں کے طور پر کام کیا کرتے تھے۔ ایک قحط کے دوران، زمینداروں نے انہیں اپنے یہاں سے نکال دیا، اور ان سے چھٹکارہ پانے کے لیے انہیں گائے اور بیل دے دیے۔‘‘ حالانکہ، دوسرے لوگوں کا کہنا ہے کہ بی بی ایم کبھی بھی زراعت پیشہ لوگ نہیں رہے۔

’’ہم لوگ بری آتماؤں کو بھگانے کے لیے اکثر و بیشتر پلاسٹک کے برتن، یا گڈے گڑیا بیچتے، یا دوسرے حقیر کام کرتے تھے، لیکن اب ہم لوگ تعلیم پر فوکس کر رہے ہیں،‘‘ راجو بتاتے ہیں، جو اس محاذ پر اپنی کمیونٹی کی مدد کرنے کے لیے وانوِل کے تعاون کی تعریف کرتے ہیں۔

کمیونٹی کا سرٹیفکیٹ حاصل کرنا ’’ہمارے لوگوں کے لیے آج بھی طویل جدوجہد کا سبب بنا ہوا ہے،‘‘ راجو کہتے ہیں۔ ’’کئی گاؤوں میں،‘‘ جیسا کہ پریما ریوتی سمجھاتی ہیں، انہیں کون سے سرٹیفکیٹ ملیں گے ’’اس کا انحصار ریونیو ڈویژنل آفیسر کی مرضی پر ہے۔‘‘

وانَوِل کو ۲۰۰۴ کی سونامی کے ٹھیک ایک سال بعد قائم کیا گیا تھا، جب راحت رسانی کی کوششوں میں خانہ بدوش لوگوں کے خلاف کھلے عام بھید بھاؤ ہو رہا تھا۔ اس طرح کی ابتدائی تاریخ کے ساتھ، یہ قدرتی آفات کے وقت راحت رسانی کے کاموں میں مصروف ہو جاتا ہے، جیسا کہ اس نے ۲۰۱۵ کے چنئی سیلاب اور ۲۰۱۸ کے غازہ سائیکلون کے بعد کیا۔

واپس ناگ پٹّینم میں، ۲۵ سالہ کے انٹونی، اپّراکُڈی بستی کے ایک نایاب، تعلیم یافتہ شخص ہیں، جن کے پاس انجینئرنگ میں ڈپلومہ ہے اور وہ ٹیلی کام سیکٹر میں کام کرتے ہیں۔ ان کا ماننا ہے کہ اگر وانوِل نہ ہوتا، تو پوری بستی بھوکے مر جاتی۔ ’’ہمارے پاس کچھ موسیقار ہیں جو ناد سورم اور تھاوِل (انگلیوں سے بجایا جانے والا ساز) بجاتے ہیں۔ لیکن وہ بھی یومیہ مزدور ہی تھے۔ لہٰذا، اس قسم کی مصیبت کی گھڑی ہمارے لیے واقعی میں پریشان کن ہے۔‘‘ یہ اسکول انہیں اعتماد بخشتا ہے، انٹونی کہتے ہیں۔

نوجوان آرتی کا بھی یہی خیال ہے، جو کہتی ہے: ’’میں نے کلاس ۱۱ کا امتحان دے دیا ہے اور مجھے معلوم ہے کہ میں پاس ہو جاؤں گی۔ مجھے اسکول کی تعلیم مکمل کرنے کے بعد ٹیچر ٹریننگ کورس کرنا ہے۔‘‘ شاید وانَوِل کو آنے والے دنوں میں ایک نیا ٹیچنگ اسٹاف ملنے والا ہے۔

کوَر فوٹو: ایم پلانی کمار

مترجم: ڈاکٹر محمد قمر تبریز