کرگل کی بلند اقتصادیات

ماہِ رمضان میں ہفتہ کے روز ایک دوپہر کو مصروف کمانڈر مارکیٹ

28 سالہ عابدہ خانم (دائیں) کہتی ہیں، ’’میں اپنی مرضی سے فاصلاتی تعلیم کے ذریعے بی اے کر رہی ہوں کیوں کہ میں مالی اعتبار سے آزاد بننا چاہتی ہوں۔ یہ دکان میری چچی کی ہے۔ شاہدہ اور میں ان کا ہاتھ بٹاتے ہیں۔ اس کے عوض میری چچی مجھے ماہانہ 7 سے 8000 روپے دیتی ہیں۔ ہمیں ایک ساتھ کام کرنا اچھا لگتا ہے۔‘‘

’’ہم جموں اور سرینگر، لدھیانہ اور دہلی جاتے ہیں، تاکہ یہاں پر بیچنے والے سامان خرید کر لا سکیں،‘‘ عابدہ خانم بتاتی ہیں۔ ان کے مطابق، عورتیں سردیوں کے آف سیزن میں شاپنگ کو ترجیح دیتی ہیں، کیوں یہ یہی وہ وقت ہوتا ہے جب انھیں بھی کرگل کی سخت ٹھنڈک سے بریک ملتا ہے۔ وہ جن سامانوں کو منگوانے کا آرڈر دیتی ہیں، وہ انھیں مئی میں سرینگر- لیہ شاہراہ کے کھلنے کے بعد مل پاتا ہے۔ نیا مال آنے سے پہلے، ان کے پاس بیچنے کے لیے پچھلے سال کا اسٹاک وافر مقدار میں موجود رہتا ہے۔

اس دکان کو اب منصور چلاتے ہیں۔ ان کی والدہ نے اسے تقریباً 20 سال پہلے کھولا تھا۔ ’’مجھے فخر ہے کہ میں اس بازار میں موجود چند مردوں میں سے ایک ہوں،‘‘ وہ کہتے ہیں، ’’اور مجھے خوشی ہے کہ فیملی کے لیے کمانے میں اپنے بزرگ والدین کی میں مدد کر رہا ہوں۔‘‘

32 سالہ سارہ (بائیں)، خاتون کاروباری کے طور پر اپنے موجودہ کام سے کافی خوش ہیں، اور اپنی چھوٹی بہن کے ساتھ مل کر اس دکان کو چلانے کا منصوبہ بنا رہی ہیں۔ ’’یہ بات کسی طرح بھی صحیح نہیں ہے کہ اسلام میں عورتوں کی حوصلہ شکنی کی جاتی ہے یا انھیں کم اہمیت دی جاتی ہے،‘‘ وہ کہتی ہیں۔ ’’میری فیملی میرا سپورٹ کرتی ہے اور میرے عقیدہ کی طاقتور خواتین رول ماڈلس نے مجھے اس بات کے لیے آمادہ کیا ہے کہ میں اپنے لیے اور اپنی فیملی کے لیے کماؤں۔‘‘

بانو، کیمرہ سے شرماتے ہوئے، کہتی ہیں، ’’مجھے تکان ہو رہی ہے اور میں روزہ کھولنے کے لیے افطار کے وقت کا انتظار کر رہی ہوں۔‘‘

یہ (اپنی گردن کے چاروں طرف اسکارف کو لپیٹ کر دکھاتے ہوئے) اونی ’اِنفنیٹی لوپ‘ ہے اور یہ کافی ٹرینڈی ہے۔ یہ کرگل آنے والے غیر ملکی سیاحوں کے درمیان زیادہ مقبول ہے،‘‘ 38 سالہ حاجی اختر کہتی ہیں۔ ’’میں نے چند گاؤوں کی عورتوں کو سیلف ہیلپ گروپ کے کاموں میں لگایا ہے، تاکہ میں ان کے کچھ کام آ سکوں، جن کے ہاتھوں سے بنائے گئے کچھ سامان، جیسا کہ میری دکان پر ہے، کو کرگل کے بازار اور کچھ ہوٹلوں پر بیچا جاسکے۔ ہمارا کاروبار اچھا چل رہا ہے، خاص کر گرمیوں کے دوران، جب ایک مہینہ میں میں 40 ہزار روپے اور بعض دفعہ اس سے بھی زیادہ کما لیتی ہوں۔‘‘

25 سالہ کنیز فاطمہ اپنی ماں کی مدد کر رہی ہیں، جو کہ اس بازار میں بیس سال پہلے دکان کھولنے والی پہلی خواتین میں سے ایک ہیں۔

فاطمہ اس دکان کو تقریباً چھ سالوں سے چلا رہی ہیں۔ ان کے شوہر محمد عیسیٰ، جو ان کے بغل میں بیٹھے ہوئے ہیں، نے اس چھوٹے بزنس کو شروع کرنے میں ان کی مدد کی تھی۔ ’’وہ اب بھی مضبوطی سے میرے ساتھ کھڑے ہوئے ہیں، انھیں اپنی بیوی پر فخر ہے،‘‘ فاطمہ کہتی ہیں۔ ’’یہ میرے لیے سب سے بڑا سپورٹ اور حوصلہ کا باعث رہے ہیں۔‘‘

’’آچے (بہن)، آپ ہماری تصویر کیوں نہیں کھینچ رہی ہیں؟‘‘ دکان پر آنے والے کچھ لڑکے مجھ سے سوال کر رہے ہیں۔