దారపు అల్లికల జీవితాలు, భాషలు

తల్లుల భాషలు

నాకుగాని మా అమ్మకుగాని బహుశా
ఓ భాషంటూ ఎప్పుడూ లేదనుకుంటా
మగవాళ్లు భాషాదురంధరులు
పురుష వారసత్వాన్ని
వారు తమ ఇష్టానుసారంగా ప్రయోగించగలరు
దూషణలను కనిపెట్టడానికి
కోపాన్ని వెళ్లగక్కడానికి
హుకుంలు జారీచేయడానికి
గట్టిగా అరవడానికి
డొల్ల ప్రేమలేఖలు రాయడానికి
గోడలపై చెక్కడానికి
చరిత్రను వక్రీకరించడానికి

మగవాళ్ల భాషలు
మందపు అట్టల నిఘంటువుల్లో చుట్టేసి ఉంటాయి
వాటిని అచ్చొత్తడానికి యత్రాలను కనిపెట్టారు
మా తల్లులు రాసిన పద్యపాదాల కింద
వారి పేర్లను అచ్చేశారు
వారి భాషలోనే రాసివున్న వారి పుస్తకాలు
మహాగ్రంథాలయాల్లోని దుమ్మపట్టిన అరల్లో
సాలెగూళ్లలో చిక్కుకుపోయాయి
చట్టసభలైనా, ఊరేగింపులైనా
అన్నిచోట్లా వాళ్లే భాషే
మాటలకు
వినడానికి
నమోదు చేయడానికి
రాతకు
అవగాహనకు
ప్రచారానికి
మా తల్లుల భాషలు వేరు
వాటి ముద్ర
వాటి ప్రభావం
వాటి శైలి
వాటి చరిత్ర
వాటి పనితీరు

మట్టితో చేసుకున్న కలాలు వాళ్లవి
ప్రేమసిరాలో ముంచి
గుగ్గిలపు మార్మిక ధూపంలో తడిపి
చెమట సంద్రాల్లో కడుక్కుని
భద్రంగా దాచుకుంటారు
పాతచీరల మడతల్లో
రేకుపెట్టెల అడుగున భద్రంగా.
ఒక అదనైన వేళ
మా అరచేతులపై నెత్తుటెరుపు సిరాతో
మా తల్లి భాషలను
రాసినవి ఆ మట్టి కలాలే

వాళ్లు కలాలను మలచుకోలేనప్పుడు
మూసిన తలుపుల వెనకాల
మా తల్లుల భాషల గురించి
రాణుల గుంరిచి దాసీల గురించి
గుసగుసలుపోతారు

గదులు లేనివాళ్లు, కోటలు లేనివాళ్లు
తమ తల్లుల భాషలను
కొడవళ్లతో పారలతో చెక్కుతారు
తమ పొలాల్లోని బురద కప్పిన నేలపై
తమ గుడిసెల్లోని మట్టినేలలపై

తమ మునివేళ్ళపై నైపుణ్యాలున్నవారు
అబయాలపై చీరలపై
మా తల్లి భాషలను
ఆరీ, ముకాయిష్, జర్దోజీల
బుటాలతో నింపేస్తారు

మా తల్లి భాషలు-
సమాధులపై చెక్కిన
చితిమంటల్లో బూడిదైన
ఎర్రటి నింగిపై రాసిన
కలలమయమైన
మగతకళ్ళ అంతరంగాలను తెరచుకుంటూ
మా తల్లి భాషలు-
విప్లవాల ఎర్రటి పొలికేకలు
మా గుండె చప్పుళ్ళు
ప్రేమ సంగీతస్వనాలు
అలుపెరగని ఆకాంక్షలు
మా తల్లి భాషలు!

మగవాళ్ల భాషలన్నీ ఒకేరకం
అవే రంగులు
అవే పొందికలు
అవే రవరవలు.
వీటిలా కాకుండా
ఎన్నెన్నో వర్ణాల్లో, ఎన్నెన్నో వైనాల్లో
కమనీయంగా.
మా తల్లి భాషలు
అఖ్తరీ కంఠం నుంచి జాలువారిన పదాల్లా
ఫాతిమా నుంచి నేర్చుకున్న పాఠాల్లా
సమున్నత ప్రేమశిఖరంలా
మా తల్లి భాషలు.

వాటిని ఒక్కొక్కటి తెంపుకుని
పదాలన్నీ సేకరించి
కొత్త చరిత్రను రాస్తున్నాం
ఉద్వేగం, సాహసం, వాదన, పదను
కలబోసుకున్న
సుదీర్ఘమైన మా తల్లి భాషల్లో...